АЛ-КУДС (АА) – И покрај опструкциите и ограничувањата на израелските власти, речиси 250.000 муслимани се собраа денеска на џума-намаз во комплексот Ал Акса во окупираниот Источен ал-Кудс (Источен Ерусалим), јавува Анадолу.
Ова е четврти џума-намаз во светиот муслимански месец Рамазан, па верниците и денеска побрзаа низ тесните улички на старото јадро на Ерусалим до комплексот Ал Акса.
Млади и стари, жени и деца ги исполнија дворовите на комплексот Ал Акса, кој се смета за трет по важност верски комплекс за муслиманите, по Ќаба во Мека и Џамијата на пратеникот во Медина.
Администрацијата на исламски вакуфи во Ерусалим соопшти дека речиси 250.000 верници денеска ја извршиле петочната молитва во комплексот Ал Акса.
Израелската полиција го засили присуството околу комплексот.
Имамот и хатиб на Ал Акса, шеикот Екрима Сабри, во денешната хутба истакна дека е важно Ал Акса да биде секогаш полна, особено во овој момент откако израелските сили извршија напади среде Рамазан и повредија десетици верници во тој комплекс.
Потсетувајќи дека израелските сили неколку пати „дивјачки“ ја нападнале Ал Акса, имамот Сабри ги поздрави верниците кои доаѓаат да се молат во тој комплекс во знак на отпор.
„Израелските војници не ја гледаат Ал Акса како свето место, бидејќи во спротивно не би ја нападнале така. Не постои место за богослужба во светот кое е изложено на напади како Ал Акса. Таа им припаѓа само на муслиманите и за тоа нема преговори. Нека знаат сите дека тоа е верски и стратешки став на муслиманите“, порача имамот Сабри.
Извор: www.aa.com.tr
