Денешниот голем празник Водици-Богојавление во селото Битуше, кое се наоѓа во општината Маврово-Ростуше, се празнува на традиционален начин, како што се правело пред многу години. Во 2019 година, обичаите при празнувањето беа прогласени за културно наследство од исклучително значење.
Главни во овој обичај се жените наречени кумстарки. Тие се облечени во народни носии, постари повеќе и од сто години. Кумстарките носат табли на главите, полни со домашен леб. Тие се упатуваат во поворка низ селото до црквата, пеејќи водичарски песни посветени на здравјето и благосостојбата. Во песните се споменуваат мажите, кои некогаш заминувале на печалба, додека жените останувале дома кои ги чувале семејствата.
По пеењето, во дворот на црквата „Свети Архангел Михаил“, се игра Јованово оро. Потоа, кумстарките одат во културниот дом на селото, каде го оставаат лебот. Мажите го сечат и подготвуваат оброкот. Први јадат кумстарките, а потоа мажите.
ИЗВОР: racin.mk
