Коалицијата ВЛЕН оцени дека договорот меѓу Северна Македонија и Соединетите Американски Држави за меѓусебна трговска и енергетска соработка претставува историски чекор кој го зајакнува стратешкото партнерство и отвора нови можности за економски развој.
Според ВЛЕН, укинувањето на царините за американските производи на домашниот пазар е силен сигнал за отвореност, конкуренција и подлабока интеграција во глобалните пазари.
Од коалицијата наведуваат дека оваа мерка ќе придонесе за подобрување на деловната клима, зголемување на конкурентноста и привлекување странски инвестиции.
„Нашата ориентација е јасна – рака под рака со САД, за модерна, отворена и конкурентна економија и за силна и кредибилна држава на меѓународната сцена“, се наведува во соопштението.
Од ВЛЕН потенцираат дека договорот отвора пат за сеопфатен трговски аранжман со кој царините би биле ограничени на најмногу 15 проценти, а за одредени производи и индустрии и до нула проценти. Тоа, според нив, ќе создаде нови можности за извоз, инвестиции и економски раст, како и поголеми изгледи за вработување.
Коалицијата нагласува дека продлабочувањето на соработката со САД е потврда за силната меѓународна поддршка што ја ужива земјата и дел од нивната визија за долгорочен економски развој и стабилност.
