Партијата ВЛЕН остро реагираше по објавувањето на извештајот на Државниот завод за ревизија за 2023 година, оценувајќи го како „директна обвинителна акта“ против ДУИ и поранешниот министер за образование Јетон Шаќири.
Според ВЛЕН, извештајот јасно го открива коруптивното и криминално однесување во Министерството за образование. Во реакцијата се наведува дека се потрошени 3,4 милиони евра за студентски дом во Тетово кој не функционира, додека 18 милиони евра студентски кредити останале неплатени уште од 1998 година. Дополнително, 13 милиони евра за научни книги не се ниту дистрибуирани ниту евидентирани, туку оставени да скапуваат по магацини, а 2,9 милиони евра се доделени за студенти во странство без никаква стратегија за нивно враќање.
ВЛЕН нагласува дека станува збор за „систематска кражба и организиран криминал против образованието“, обвинувајќи ја ДУИ за уништување на иднината на младите генерации. Партијата потсетува и на другиот негативен извештај на Државниот завод за ревизија за злоупотребите при организацијата на Самитот на ОБСЕ во Скопје, во време кога министер за надворешни работи бил Бујар Османи, како уште еден доказ за нетранспарентното управување со јавните пари.
„ВЛЕН бара итна истрага и кривична одговорност за сите кои злоупотребиле јавни средства. Никој не е над законот. Времето на крадење во образованието и институциите заврши“, стои во реакцијата на партијата.
