Власта и опозицијата обединети во ставот за судбината на Евреите: Никогаш да не се заборави, за да не се повтори

По повод годишнината од холокаустот на македонските Евреи, делегации од двете најголеми политички партии денеска присуствуваа на комеморативните настани организирани од Еврејската заедница во земјава. Упатија порака да не се заборави, ниту, пак, да не се повтори судбината на македонските Евреи

Обраќање од одбележувањето на 80-годишнината од холокаустот на македонските Евреи имаше и шефот на државата Стево Пендаровски, кој нагласи дека за да има помирување, треба да има извинување за улогата на профашистичката влада на Софија во тоа време за депортацијата на македонските Евреи

Никогаш да не се заборави, за да не се повтори – е обединетиот став на двете најголеми политички партии во земјава, владејачкиот СДСМ и опозициската ВМРО-ДПМНЕ, во врска со судбината на македонските Евреи кои пред 80 години на денешен ден биле депортирани во логорот во Треблинка.

По повод годишнината од холокаустот на македонските Евреи, делегации од двете партии денеска присуствуваа на комеморативните настани организирани од Еврејската заедница во земјава.

„Холокаустот на Евреите е тажно поглавје од светската историја, но и постојан потсетник со сите сили да се бориме против сите форми на антисеминизам и меѓучовечка и меѓунационална омраза. Никогаш да не се заборави, за никогаш да не се повтори“,

порача делегацијата на СДСМ составена од организациониот секретар Вангел Андрески и членката на ИО, Милена Стевановиќ.

Слична порака упати и лидерот на опозицијата Христијан Мицкоски кој порача дека на историјата треба да гледаме како на поука која кажува оти војната и непријателството го раѓа, како што вели, семето на злобата, уништувањето и заедничката несреќа.

„Таквиот геноцид е најцрниот настан во историјата на човештвото. Катастрофата од геноцидот никогаш да не се повтори, но и да не се заборави!“,

порача Мицкоски.

Пред спомениците на депортираните Евреи и на паднатите борци на НОБ на градските гробишта во Бутел, денеска во име на Владата оддадода чест и положија свежо цвеќе министрите за животна средина и за транспорт и врски Каја Шукова и Благој Бочварски.

На спомен обележјето во чест на депортираните Евреи од Македонија во дворот на некогашниот Тутунски комбинат Скопје утринава, меѓу другите, се обрати и вицепремиерот Фатмир Битиќи кој порача дека гласот на разумот, светлината, прифаќањето, човечноста и демократијата мора да е гласен и јасен, да го слушнат сите.

„Нивните животи можеби завршија, но нивниот дух е постојано со нас, да не потсетува и да не храбри. Злото на Холокаустот не смее да се повтори“,

рече Битиќи кој ја предводеше Владината делегација.

Обраќање од одбележувањето на 80-годишнината од холокаустот на македонските Евреи имаше и шефот на државата Стево Пендаровски, кој нагласи дека за да има помирување, треба да има извинување за улогата на профашистичката влада на Софија во тоа време за депортацијата на македонските Евреи.

Пендаровски потсети и на моралната обврска што ја имаат граѓаните, а тоа е, како што рече, да не забораваат и да не дозволат никогаш повеќе силите на злото да добијат шанса да го повторат злосторството.