Откако на крајот на април заврши мерката со ограничените маржи на дел од производите и одлуката за утврдување на највисоки цени, можни се нови владини мерки ако во меѓувреме производите драстично поскапеле.
„Состојбата со цените јас апсолутно ја следам одблиску и реков дека трикови нема да толерирам. Внимателно следиме што се случува во маркетите.“, вели Христијан Мицкоски.
Мицкоски вели дека ќе се реагира ако има непринципиелни практики кај трговците.
Тој конкретно беше прашан за цените на дел од овошјето кое може да се најде на пазарите и во маркетите.
„Црешите не се 500 денари за килограм. Црешите се движат од 200 до 300 денари за килограм, но и тоа е многу. Тоа е така, поради студот и тоа што беше навистина елементарна непогода за црешите. Истото го афектираше и ресенското јаболко.“, додаде Христијан Мицкоски.
Конкретен став за евентуалните мерки ќе се формира откако на владина седница ќе се разгледа извештајот на Државниот пазарен инспекторат – инспекторите беа на терен во мај, но и месецов, за да проверат дали откако заврши претходната мерка има драстична промена по џебот на потрошувачите.
„Нема драстично зголемување на цените во делот каде што ние сме надлежни, во делот на основни прехранбени производи. Секој месец Државниот пазарен инспекторат ќе биде на терен, ќе гледа и ако случајно се случува да имаме енормно зголемување на цените без економска оправданост на трговците, нормално дека ќе донесеме пак одлуки.“, вели Бесар Дурмиши.
Според министерот за економија Бесар Дурмиши, новите одлуки можат да бидат уште поризгорозни за трговците, производителите и дистрибутерите, ако кај нив во мај и јуни се утврди девијантно однесување.
ИЗВОР: ТВ 21
