Кандидатот за градоначалник на Град Скопје, Орце Ѓорѓиевски, ја започна својата кампања со порака дека започнува „голема приказна“ која ќе се пишува заедно со граѓаните.
„Овој почеток на кампањата е почеток на ново поглавје за Скопје. Ќе се сретнеме со секој од вас, ќе ги слушнеме вашите маки, ќе погледнеме на проблемите право во очи и ќе понудиме решенија. Вистинската сила е во народот, во нашите сограѓани, во секој глас кој бара подобро утре“, порача Ѓорѓиевски.
Тој истакна дека Скопје заслужува да биде модерен и горд град – со чиста животна средина, развој и достоинство, нагласувајќи дека дадениот збор за него значи обврска од која нема отстапки.
„Заедно ќе изградиме град каков што заслужуваат нашите деца, нашите семејства, сите ние. Ова е моментот кога започнуваме со чисто срце, со решителност и со силна верба“, додаде Ѓорѓиевски.
Со паролите „Вистинскиот избор“ и „Најдоброто допрва доаѓа“, Ѓорѓиевски најави дека неговата визија е враќање на достоинството на Скопје и изградба на град на гордост за сите граѓани.
