АНКАРА (АА) – Високиот комесар за човекови права на Обединетите нации (ОН), Фолкер Турк, го повика Израел што поскоро да престане со насилството на окупираниот Западен Брег, известува Анадолу.
„Израел мора итно да ги реорганизира своите политики и активности на Западниот Брег во согласност со меѓународните стандарди за човекови права, вклучително и заштитата и почитувањето на правото на живот“, наведе Турк во писмената изјава што ја објави.
Изјавувајќи дека за да заврши насилството на Западниот Брег потребно е да заврши и окупацијата на тоа подрачје, Турк рече: „Луѓето со политичка моќ од секоја страна го знаат тоа и за да се постигне тоа, потребно е што е можно поскоро да ги преземат неопходните чекори.“
Истакнувајќи дека овонеделното насилство на Западниот Брег „поседува висок ризик да излезе од контрола“, Турк ги критикуваше „неодамнешните смртни случаи и насилство, кои кога ќе се соединат со провокативната реторика, може да послужат само за повлекување на Израелците и Палестинците уште подлабоко во пеколот“.
– Израел предизвикува ескалација на тензиите
Израелската Армија ги засили притисоците и нападите врз окупираниот Западен Брег во последните денови, предизвикувајќи смрт на голем број Палестинци, што предизвика ескалација на тензиите во регионот.
Израелските сили во понеделникот извршија напад врз градот Џенин во северниот дел од Западниот Брег, користејќи голем број оклопни возила, како и хеликоптери од типот „Апачи“. Во нападот животот го загубија 7 Палестинци, од кои 2 деца, а најмалку 66 Палестинци беа повредени. Во судирите се повредени и 7 израелски војници.
По крвавиот напад во Џенин, вчера во близина на бензинска пумпа во илегалната еврејска населба Ели во Западниот Брег, се случи вооружен напад, во кој животот го загубија 4 израелски доселеници.
Околу 700.000 еврејски доселеници живеат во окупираниот Западен Брег и во Источен Кудс (Ерусалим). Според меѓународното право, еврејските населби изградени во Западниот Брег и во Источен Кудс се сметаат за нелегални.
Со крвавите напади на Израел врз Западниот Брег и воздушните напади врз Појасот Газа, кој се наоѓа под блокада, бројот на убиени Палестинци од Нова година досега се зголеми на 175.
Извор: www.aa.com.tr
