БЕРЛИН (АА) – Началникот на одбраната на Германија предупреди дека вооружените сили на земјата не се во состојба добро да ја бранат земјата во случај на странски напад, јавува Анадолу.
Говорејќи на конференцијата „Безбедност и одбрана 2024“ на „Ханделсблат“, генералот Карстен Бреуер нагласи дека на германските вооружени сили им се потребни нови способности и оружје за да станат повторно „способни за војна“.
„Ова прашање се поставува многу често, па дозволете ми да кажам вака. Ако сега нѐ нападнат, дали би можеле да се одбраниме? Да, би можеле. Но дали можеме да го направиме тоа добро? Не, не можеме“, им рече Бреуер на учесниците на конференцијата.
Тој истакна дека со најновите договори за набавки Германските вооружени сили ќе можат да го затворат јазот меѓу расположливото оружје и потребните воени капацитети.
„Веројатно ќе можеме да го премостиме овој јаз за две до три години, во секој случај, тоа ќе биде за помалку од пет или осум години“, додаде тој.
Германија реши масовно да го зголеми трошењето за одбраната по руско-украинската војна и формира специјален фонд од 100 милијарди евра за купување напредни системи за оружје и модернизација на вооружените сили на земјата.
Како дел од планот, Владата веќе склучи неколку договори, меѓу кои и за купување на борбените стелт-авиони Ф-35 од САД, транспортни хеликоптери Чинук и израелскиот одбранбен противракетен систем Стрела-3.
Извор: Anadolu Agency (AA)
