Претходно, Градската изборна комисија се прогласила за ненадлежна и жалбата ја предала на Републичката изборна комисија
Вишиот суд во Белград отфрлил уште една жалба на коалицијата „Србија против насилството“ и со тоа го потврдил ставот на Градската изборна комисија дека не е надлежна да одлучува за поништување и повторување на парламентарните избори, пренесува српски Телеграф.
Како што истакнал и претседателот на ова тело, Зоран Лукиќ, Градската изборна комисија по повод на приговорот на коалицијата, која барала поништување на парламентарните избори на сите избирачки места, се прогласила за ненадлежна и жалбата ја предала на Републичката изборна комисија.
Против ваквата одлука на Градската изборна комисија е поднесена жалба, која Вишиот суд во Белград ја отфрлил како неоснована.
Републичката изборна комисија, пак, вчера донела решенија за спроведување на прегласувањето на избирачките места каде се поништило гласањето од парламентарните избори одржани на 17 декември.
Претходно РИК соопшти дека право на глас на повторените избори ќе имаат 12 240 гласачи и дека тие ќе се одржат на 28 места на 30 декември.
Извор: 360stepeni.mk
