Министерството за внатрешни работи информираше дека е идентификуван возачот кој вчера беше снимен како со патничко возило влече врзан коњ низ скопските улици. Станува збор за автомобил марка „Голф“ со скопски регистарски ознаки, а видеото предизвика бурни реакции на социјалните мрежи.
Полициските службеници од СВР Скопје веднаш презеле мерки за да го утврдат идентитетот на сторителот и да го документираат случајот како можен акт на мачење на животни, дело казниво по член 233 од Кривичниот законик.
„По сите преземени мерки и дејствија, СВР Скопје го утврди возачот на возилото. Со него е извршен службен разговор, а случајот е пријавен кај надлежен јавен обвинител“, се наведува во соопштението на МВР.
Според истото соопштение, до Основното јавно обвинителство Скопје ќе биде доставен целокупниот документиран материјал за понатамошно постапување по насоки на обвинителот.
ИЗВОР: racin.mk
