Четворица волонтери кои ќе живеат таму ќе помогнат во подготовката на идната мисија на Црвената планета. Со мерење на нивните перформанси и когнитивни способности, НАСА подобро ќе ги разбере „ресурсите“ што мора да се обезбедат за време на ова амбициозно патување
Четири мали соби, теретана и многу црвен песок – НАСА откри куќа во која од јуни ќе бидат сместени четири лица повеќе од една година за да симулира живот на Марс.
Живеалиштето наречено Mars Dune Alpha се наоѓа во истражувачки капацитет на американската вселенска агенција во Хјустон, Тексас.
Четворица волонтери кои ќе живеат таму ќе помогнат во подготовката на идната мисија на Црвената планета. Со мерење на нивните перформанси и когнитивни способности, НАСА подобро ќе ги разбере „ресурсите“ што мора да се обезбедат за време на ова амбициозно патување, рече во вторникот Грејс Даглас, програмската менаџерка на CHAPEA што го надгледува експериментот.
„Тоа ќе биде навистина важна информација за донесување клучни одлуки за ресурсите“,
рече таа за време на турнејата на новинарите низ живеалиштето.
Таквата мисија доаѓа со „многу строги масовни ограничувања“, додаде таа.
Што содржи куќата
Волонтерите ќе живеат во куќа од 160 квадратни метри со две бањи, вертикална фарма за зелена салата, соба за медицинска нега, простор за релаксација и неколку работни станици.
Воздушната комора води до „надворешна“ реконструкција на околината на Марс – иако сè уште е внатре во хангарот.
Неколку парчиња опрема што најверојатно ќе ја користат астронаутите се расфрлани низ подот со црвен песок, вклучувајќи метеоролошка станица, уред за правење тули и мала стаклена градина.
Има и лента за трчање каде астронаутите ќе одат обесени на ремени за да ја симулираат помалата гравитација на Црвената планета.
„Не можеме да ги натераме само да одат во круг шест часа. Четворица волонтери ќе ја користат лентата за трчање за да симулираат долги патувања надвор за да собираат примероци, податоци или да изградат инфраструктура“,
рече Сузан Бел, директорка на Лабораторијата за здравје и перформанси на НАСА.
Редовни тестови
Членовите на првиот експериментален тим допрва треба да бидат именувани, но агенцијата соопшти дека изборот „ќе ги следи стандардните критериуми на НАСА за кандидатите за астронаути“.
Научниците редовно ќе ја тестираат реакцијата на екипажот на стресни ситуации, како што се ограничената достапност на вода или дефекти на опремата.
Живеалиштето има уште една посебна карактеристика: беше испечатено со 3Д технологија.
„Тоа е една од технологиите што НАСА ги проучува за потенцијално градење живеалишта на други планетарни или лунарни површини“,
рече Даглас.
НАСА е во рана фаза на подготовка за мисија на Марс, иако најголемиот дел од фокусот на агенцијата е на претстојните мисии Артемис, чија цел е да ги вратат луѓето на Месечината за првпат по половина век.
Извор: 360stepeni.mk
