Една жртва имаше и во Словенија, а во Босна и Херцеговина има и над 20 повредени. Во Србија засега нема информации за загинати, а биле евакуирани 15 лица
Северниот и средишниот дел на Хрватска како и источниот регион Славонија денеска попладне беа зафатени со страшно невреме. Силен вета и обилни врнежи направија хаос и во главниот град Загреб. Невремето носеше се пред себе, а улиците беа поплавени при што е направена огромна материјална штета, јавува „Индекс.хр“.
Во Загреб загинаа две лица, а едно во Славонија. Повеќе од 60 лица, пак, се повредени.
Но, во текот на ноќта, како што пренесува хрватскиот портал, се очекува ново невреме. Според предупредувањето од службата за цивилна заштита, на сила е црвено аларм на предупредување за невреме со грмотевици за регионите Загреб и Карловац.
Невремето ја зафати и Босна и Херцеговина (БиХ), а како што јави порталот „Аваз“, загинала една жена во Брчко, а над 20 повредени лица побарале лекарска полош. Жената загинала во дворот каде ја погодил струен удар.
И таму има голема материјална штета односно оштетени автомобили, откорнати дрвја, оштетени кровови, а грмотевиците предизвикале и два пожари.
Невремето вечерва ја погоди и Србија каде бројни населени места останаа без струја. Според српските медиуми, во Белград паднале два кранови на градилишта, а и таму има оштетени возила, паднати дрвја, откорнати делови од згради итн.
Противпожарните екипи, пак, евакуирале 15 луѓе кои биле во опасност од невремето, а засега нема информации за жртви.
Српскиот претседател Александар Вучиќ, кој се наоѓа во Брисел, порача дека по враќањето во Белград ќе се занимава со последиците од невремето и изрази надеж дека ќе нема жртви.
Словенија која прва во регионот беше погодена од невремето, како што веќе информиравме, забележа една жртва во туристичкото место Блед.
Извор: 360stepeni.mk
