Сослушувањето беше затворено за камери и пренос во живо
Поранешниот американски претседател Доналд Трамп пристигна пред судот во Мајами за да се соочи со федералните обвиненија. Тој повторно беше официјално уапсен.
Тој е обвинет за незаконско задржување доверливи документи и лажење на службениците кои се обиделе да ги вратат, но Трамп тврди дека е невин и вети дека ќе продолжи со кампањата за изборите во ноември 2024 година.
Трамп во судницата пред американскиот судија Џонатан Гудман се изјасни за невин по сите обвиненија, јавува Си-ен-ен.
Сослушувањето беше затворено за камери и пренос во живо.
Алина Хаба, адвокатка и портпаролка на Доналд Трамп, застана во одбрана на поранешниот американски претседател пред судот во Мајами.
„Одлуката да се обвини Трамп и да се затворат очите пред другите е симболична за корупцијата што ја имаме овде“,
рече Хаба, повторувајќи ги тврдењата на Трамп дека обвиненијата се политички мотивирани.
„Ние сме на пресвртница во историјата на нашата нација. Ова е насочено гонење“,
рече таа.
Иако Хаба е адвокатка на Трамп, таа не го застапува во овој случај.
Трамп е првиот поранешен или сегашен претседател кој се соочува со кривични пријави, но правните експерти велат дека тоа не го спречува да се кандидира за функција или да ја преземе функцијата претседател дури и ако е осуден.
Обвинението се состои од 37 точки (кривични дела). Станува збор за документи што Трамп ги чувал на својот приватен имот на Флорида каде што дел од нив биле и во салата за бал и во бањата.
Доверливите документи што ги чувал тој се однесувале на: нуклеарните програми на САД, одбранбените и вооружени способности, потенцијалните слабости на САД и сојузниците при евентуален воен напад и планови за евентуална одмазда како одговор на напад од странски сили.
Трамп претходно беше обвинет и од Окружното обвинителство на Менхетн за фалсификување деловни документи во врска со пари платени на порноѕвезда во замена за молчење за аферата пред претседателската трка во 2016 година.
Трамп чувал доверливи документи на САД во бањата и салата за бал на неговиот имот во Флорида
Фото: EPA-EFE/JUSTIN LANE
Извор: 360stepeni.mk
