(ВИДЕО) Снежни виулици, сообраќајни блокади и ниски температури – невремето „Барбара“ ја погоди Грција

Вонредна состојба е прогласена во Централна Евија каде невремето прави проблеми особено во областа на планината Дирфис. Во регионот Фтиотида во Централна Грција во тек е справувањето со мразот на патиштата, а за тоа се користи тешка механизација

Грчкиот регионот Пелопонез, особено делот кај Атика се погодени од т.н. студен временски фронт „Барбара“ проследен со силни снежни врнежи. Невремето почна синоќа и сè уште трае што го отежна и поморскиот сообраќај, а редовните линии на бродовите се во прекин на пристаништата Пиреја, Рафина и Лаврио.

Полицијата денеска напладне го забрани сообраќајот во некои предградија на Атина. Во префектурата Атика сообраќајната полиција апелираше возачите задолжително да користат зимска опрема за своите возила, а на афтопатиштата забрането е движење за тешки товарни возила.

Државните институции со свои екипи се постојано на терен. Полицијата, противпожарните бригади, вооружените сили, цивилната заштита, како и регионалните и градските власти поставија патроли за да им помагаат на граѓаните каде што има потреба за тоа.

Вонредна состојба е прогласена во Централна Евија каде невремето прави проблеми особено во областа на планината Дирфис. Во регионот Фтиотида во Централна Грција во тек е справувањето со мразот на патиштата, а за тоа се користи тешка механизација.

„Изминатата ноќ беше интензивна поради мразот, но временските феномени стануваат се поинтензивни од рано утрово“,

изјави за АНА-МПА заменик-регионалниот директор Елиас Санидас.

Најавено е дека училиштата и градинките во Атика ќе бидат затворени во следните неколку денови.