(ВИДЕО) Нов силен земјотрес ја погоди Турција, бројот на загинатите се зголемува

Засега не е познато колкава штета е направена од вториот земјотрес, кој исто така се почувствувал низ целиот регион

Втор земјотрес со јачина од 7,7 степени според Рихтеровата скала, го погоди округот Елбистан во турската провинција Кахраманмарас. Според извештаите на Европско-медитеранскиот сеизмолошки центар вториот земјотрес се случи во 13:24 часот по локално време. Земјотресот бил на длабочина од два километри, на оддалеченост од 67 километри североисточно од Кахранманмараш.

Засега не е познато колкава штета е направена од вториот земјотрес, кој исто така се почувствувал низ целиот регион.

Официјален претставник на турската Управа за управување со катастрофи и вонредни состојби изјави дека тоа не бил последователен потрес и дека е независен од земјотресот утринава.

Најмалку 70 загинати веќе беа пријавени низ Кахраманмарас по првиот земјотрес.

Турскиот претседател Реџеп Таип Ердоган објави дека најмалку 912 луѓе загинаа во Турција во земјотресот со јачина од 7,8 степени според Рихтеровата скала што ја погоди земјата утринава. Тој додаде дека во земјотресот се повредени 5 383 луѓе, а 2 818 згради се урнале во Турција.

Ердоган рече дека не може да предвиди колку ќе се зголеми бројот на загинати додека продолжуваат напорите за пребарување и спасување.

Според сириските државни медиуми, бројот на загинати во областите под контрола на владата во Дамаск се искачи на најмалку 237 лица, а повеќе од 639 се повредени. Информациите соопштени од страна на Белите шлемови – волонтерска организација што делува во сириските области под контрола на опозициските бунтовници – велат дека таму бројот на загинати изнесува најмалку 147 луѓе.

Во меѓувреме ЕУ мобилизираше повеќе од 10 тимови за пребарување и спасување за да и помогне на Турција
по големиот земјотрес што ги погоди оваа земја и Сирија утринава.

Утринскиот земјотрес со јачина од 7,8 степени според Рихтерова скала е најсилниот во Турција во последните 84 години.

Епицентарот на земјотресот бил близу градот Газијантеп на длабочина од 17,9 километри. Тој се случил во 4:17 часот по локално време и бил почувствуван и во Либан, Кипар и Израел, а потоа имало уште два со јачина од 6,4 и 6,5 степени.