Седницата на мексиканскиот Сенат заврши со хаос во средата, откако меѓу сенаторите избувна физичка пресметка за време на дебата околу можната воена интервенција на САД во земјата.
Инцидентот се случи додека се изведуваше националната химна. Според снимките од преносот во живо, сенаторот Алехандро Морено, лидер на опозициската Партија на институционална револуција (ПРИ), се приближи до говорницата и го зграпчи претседателот на Сенатот, Жерар Фернандез Нороња, член на владејачката партија Морена. Настана турканица, а на снимката се гледа и како маж во одело се обидува да го удри Нороња, додека Морено соборува друг човек во зелена кошула на подот. Подоцна Нороња изјави дека станува збор за негов соработник, кој се појавил на прес-конференција со медицинска јака и завој на раката.
Морено, пак, на социјалните мрежи тврдеше дека реагирал бидејќи владејачката партија ја сменила агендата со цел да ја спречи опозицијата да зборува. „Кукавичлукот предизвика сè што се случи потоа. Да биде јасно – првата агресија дојде од Нороња“, напиша тој.
Нороња ги обвини опозициските сенатори за насилството, наведувајќи дека биле обединети против него. Тој најави дека ќе поднесе извештај против Морено поради закани со убиство и ќе побара негово исклучување, како и исклучување на другите опозициски претставници кои учествувале во инцидентот.
Ова не е првпат во мексиканскиот парламент да дојде до физички конфликт. Последен поголем инцидент беше забележан во 2006 година, кога избувна масовна тепачка меѓу пратениците непосредно пред инаугурацијата на тогашниот претседател Фелипе Калдерон по оспорените избори.
Mexico’s senate erupted into violence with punches, pushing and shouting after an opposition party leader grabbed the chamber’s president as the session was wrapping up https://t.co/9MLUQjnfwP pic.twitter.com/FMEIZbwR7a
— Reuters (@Reuters) August 28, 2025
Извор: tv21
