Министерот за спорт, Борко Ристовски, денеска присуствуваше на пуштањето во употреба на новиот затворен базен во Штип заедно со премиерот Христијан Мицкоски и градоначалникот Иван Јорданов.
„Ова е еден од базените кои пред повеќе години беа оставени недовршени. На почетокот на годината ветив дека ќе ја завршиме нивната изградба и ќе ги ставиме во функција на граѓаните – денеска тоа ветување стана реалност,“ изјави Ристовски.
Со ова, граѓаните на Штип добиваат современ спортски објект, а по базенот во Кисела Вода, следуваат и финализации на базените во Кичево, Битола и Ѓорче Петров. Инвестицијата за проектот изнесува 46.735.815 денари со ДДВ.
Ристовски нагласи дека развојот на спортската инфраструктура е клучен за подигнување на здрави генерации и дека Владата продолжува со реализација на капитални проекти.
„Ги исполнуваме ветувањата и стоиме зад дадениот збор,“ додаде министерот.
