Прелиминарното теренско тестирање, на кое се повикува „Вашингтон пост“, а кое покажа дека белата прашкаста материја е најверојатно кокаин, не е конечно. Примерок од супстанцата е испратен на натамошно лабораториско испитување за да се утврди за каква точно материја се работи, а ќе се испитува и како таа се нашла во Белата куќа
Белата прашкаста материја, која беше пронајдена во неделата вечерта во Белата куќа и што предизвика привремена евакуација на претседателскиот комплекс, најверојатно е кокаин, покажуваат прелиминарните теренски тестирања, кои денеска ги објави „Вашингтон пост“, повикувајќи се на извори од истрагата.
Ова тестирање не е конечно, а примерок од супстанцата е испратен на натамошно лабораториско испитување за да се утврди за каква точно материја се работи. Ќе се испитува и како таа се нашла во Белата куќа.
Портпаролот на Тајната служба, Ентони Гуглиелми, во изјава за Ројтерс вели дека прашкастата материја била пронајдена за време на рутинска контрола од страна на припадниците на Тајната служба во западното крило на Белата куќа. Западното крило е голем дел од Белата куќа на повеќе нивоа што ги содржи канцелариите на претседателот на Соединетите Држави, вклучувајќи ја Овалната соба, прес-салата, канцелариите и работниот простор за советниците и персоналот на претседателот.
„Во неделата вечерта, комплексот на Белата куќа беше затворен како мерка на претпазливост, бидејќи агентите на Тајната служба истражуваа непознат предмет пронајден во работната област“,
рече портпаролот на Тајната служба.
Тој не ги потврди прелиминарните резултати од тестот, велејќи дека материјата е испратена на дополнително тестирање и дека истрагата е во тек, вклучително и за тоа како супстанцата влегла во Белата куќа.
Претседателот Џо Бајден не бил во Белата куќа во моментот кога била пронајдена материјата.
Извор: 360stepeni.mk
