Изводите за раѓање, венчаниците и умрениците што ги издава Управата за водење матични книги нема да содржат графа за националност. Според Уставниот суд, овој податок е во спротивност со темелната вредност за слободно изразување на националноста. Уставните судии денеска ги укинаа спорните одредбите од Законот за матична евиденција, усвоен во 1994-тата година.
„Станува збор за приватно и внатрешно чувство на човекот и никој не може да биде принуден тоа чувство јавно да го манифестира и уште повеќе, да биде предмет на задолжително институционално администрирање во јавните исправи“, рече Христина Беловска, портпаролка на Уставен суд.
Дополнително, како што образложија од судот, Уставот ја гарантира тајноста и сигурноста на личните податоци и на секој граѓанин му се почитува заштита на приватноста. Согласно Уставот, граѓанинот има право и да не ја споделува својата националност, па и да ја промени. Инаку, Уставниот суд постапуваше по иницијатива од Левица.
„Со оглед дека денешната одлука е укинувачка, повеќе не постои правен основ во матичните книги на родени, венчани и на умрени да се бара податок за националноста“, рече Беловска.
На својот фејсбук профил, денешната одлука кусо ја искоментира министерот за правда Кренар Лога.
„5:3 надгласување од страна на судиите од мнозинството (54%) врз судиите од НЕмнозинството (46%)“, напиша Лога.
Левица поднесе иницијатива доУставниот суд, откако претходно министерот за правда Кренар Лога побара да се почитува Законот и да се впишува графата за националност. Тој изработи и Упатство по кое одреден период и се издаваа изводи со ваква графа, се додека уставните судии времено не го запреа спроведувањето на Упатството. Лога сметаше дека со вметнувањето на етничката графа ќе се спречат злоупотребите со балансерот за вработување во администрација.
Лука Андреев
Извор: alsat.mk
