Администрацијата на американскиот претседател Доналд Трамп соопшти дека става на платено административно отсуство голем дел од персоналот на Агенцијата на САД за меѓународен развој (УСАИД) и затвора 1.600 работни места во земјата.
Во соопштението објавено во неделата пред полноќ, УСАИД информира дека административното отсуство се однесува на сите вработени, освен на директорите и клучниот персонал ширум светот.
Покрај тоа, агенцијата започнува процес на намалување на бројот на вработени, што ќе опфати околу 1.600 работни места во САД. Според претходно испратено известување, првично се најавувало дека отпуштањата ќе опфатат до 2.000 вработени.
Поранешни високи функционери на УСАИД проценуваат дека повеќето од вкупно 4.600 вработени, вклучувајќи службеници во државната администрација и дипломатски персонал, ќе бидат ставени на административно отсуство.
– Оваа администрација и државниот секретар Марко Рубио се кусогледи во намалувањето на експертизата и капацитетот на УСАИД за брза реакција во кризни ситуации. Овие експерти се први на терен во случаи на епидемии или раселување на население, помагајќи во стабилизирање на ситуацијата и доставување помош – изјави поранешната функционерка Марсија Вонг.
Процесот на кратење на федералните работни места го води Одделот за владина ефикасност (ДОГЕ), предводен од милијардерот Илон Маск. Минатиот петок, федерален судија ѝ даде зелено светло на администрацијата на Трамп да продолжи со ставање на илјадници вработени во УСАИД на административно отсуство.
ИЗВОР: racin.mk
