Министерот Зоран Љутков очекува дека процедурите за законско градење на објектот на Универзална сала ќе траат три-четири месеци. Неговите правници и надворешни консултанти работат на преносот на проектот од Град Скопје во Министерството за култура и туризам.
„Мора да се направат промени во законите, постојат пет-шест чекори. Проектот е во ред и немаме забелешки на изведувачот од првата фаза“, рече Љутков.
Тој додаде дека за втората фаза, која е стопирана, ќе биде распишан нов тендер, бидејќи проектот не е целосно завршен. „Неопходно е уредување на платото и мебел во Универзалната сала за проектот да биде „клуч на рака““, истакна министерот.
Љутков потврди дека немаат извештај за штетата помеѓу првата и втората фаза, ниту проценка на вкупната вредност на објектот.
На прашањето дали гарантира дека Скопје ќе има нова Универзална сала до 2028 година, тој нагласи дека подобро е процесот да биде спроведен легално, отколку да се забрза без основа. „Ако продолжиме вака, ќе носам кривична одговорност и проектот нема да биде готов до 2028 година“, додаде Љутков.
ИЗВОР: ТВ 21
