Украина почна да ги користи касетните бомби, објавија американски медиуми

Според Си-ен-ен, ова е дел од контраофанзивата на Украина, а САД сè уште чекаат информации од украинските сили за тоа каков бил ефектот на бојното поле од употребата на ова оружје

Украинската војска почна да ги користи касетните бомби што ѝ ги дадоа САД за борба против руските сили.

Информацијата денеска ја објавија американскиот весник „Вашингтон пост“, кој се повикува на неиуменувани украински претставници, како и „Си-ен-ен“ пренесувајќи тврдења од две официјални лица на САД и уште еден анонимен извор упатен во ова прашање.

Според весникот, касетната муниција Украина ја користи против добро утврдени позиции на руската армија на југоистокот на земјава. Телевизијата, пак, во објавата наведува дека употребата на ова оружје е во рамки на контраофанзицата против Русија и оти САД сè уште чекаат информации од украинските сили за тоа колку било ефикасно користењето на касетните бомби.

Употребата на овој вид оружје е забранета повеќе од 100 години, но САД, Украина и Русија не се потписници на оваа Конвенција.

Русија, според податоците на Обединетите нации (ОН), од почетокот на воената агресија врз Украина во февруари лани, дури 24 пати употребила касетни бомби во населени места.

Одлуката ваква муниција да ѝ се додели и на украинските сили, САД ја објавија на 8 јули, на што дел од сојузниците се противеа.

Оваа муниција претставува канистер кој во себе носи десетици до стотици мали бомби, наречени подмуниција. Канистрите можат да бидат исфрлени од авион, испалени во проектил или од артилерија, бродски топови и ракетни фрлачи.

Кога канистерот ќе ја достигне програмираната височина или локација, тој се отвора и од него излетуваат малите бомби. Тие, пак, зависно од видот, експлодираат при контакт со тлото или пак се темпирани, со одбројување. При експлозијата, секоја мала бомби исфрла огромен број на шрапнели во сите правци. Целта на касетната муниција, вообичаено, е да онеспособи пешадиски единици или тенкови.