Бројот на загинати во руските напади на Тернопољ се зголеми на 16, додека 64 лица се повредени, соопшти полицијата на Тернопољската област.
Според последните податоци, до 12 часот по локално време потврдена е смртта на 16 лица, 64 се повредени, меѓу кои 14 деца, а 45 лица се спасени, пренесува Укринформ.
Полицијата наведува дека во нападите биле оштетени објекти од индустриската и критичната инфраструктура, додека опсегот на разурнувањето сè уште се утврдува. На местата на удар се ангажирани истражни тимови на полицијата, патроли, криминалистички техничари, екипи за отстранување експлозивни средства, припадници на служби за вонредни ситуации и медицински тимови. Психолозите на Националната полиција и други надлежни служби им пружаат поддршка на повредените и загрозените граѓани.
Претходно денеска, претседателот на Украина, Володимир Зеленски, соопшти дека во нападот врз Харков се повредени најмалку 46 лица, а во ноќта помеѓу 18 и 19 ноември Русија лансирала повеќе од 470 борбени дронови и 48 ракети од различни типови на територијата на Украина.
„Секој напад врз секојдневниот живот покажува дека притисокот врз Русија не е доволен. Ефикасните санкции и помошта за Украина можат тоа да го променат. Приоритет се ракети за ПВО, дополнителни системи, зајакнување на капацитетите на борбената авијација и производство на дронови за заштита на животот“, истакна Зеленски.
Извор: tv21
