Управата за јавни приходи (УЈП) информира дека во законскиот рок завршила со генерирање на годишните даночни пријави (ДЛД-ГДП) за 2024 година. Оттаму информираат дека изгенерирани се 841.671 даночна пријава за 2024 година, што е раст од 6 отсто, односно 47.947 повеќе генерирани даночни пријави за минатата година споредено со 2023 година, кога биле генерирани 793.724 пријави.
„Ги повикуваме граѓаните најдоцна до крајот на месец мај да направат увид во генерираните ДЛД-ГДП кои се однесуваат за остварените приходи во 2024 година, а се поставени на нивните кориснички профили на системот „ е-даночни услуги“. Секој кој е регистриран на системот „е-даночни услуги “ има обврска во својот кориснички профил, најдоцна до 31 мај, да ја потврди или да ја коригира годишната даночна пријава доколку е потребно да се направи корекција“, информираат оттаму.
По истекот на овој законски рок потврдените и годишните даночни пријави кои не се потврдени ниту се коригирани ќе се сметаат за конечни, а коригираните даночни пријави ќе треба да се одобрат од страна на службено лице од Управата за јавни приходи.
„Ако службеното лице не ја одобри коригираната даночна пријава, Управата за јавни приходи ќе донесе решение за утврдување на данокот на личен доход за 2024 година. Кај обврзниците во чија ДЛД-ГДП се појавува обврска за доплата на данок, по истекот на рокот за потврдување и коригирање, ќе се генерира налог за доплата со фолио број и истиот ќе биде содржан на третата страна во печатењето на даночна пријава (PDF документот)“, се наведува во соопштението на УЈП.
Обврзниците во чија ДЛД-ГДП се појавува повеќе платен данок, имаат можност во самата пријава да искажат барање за враќање на данокот.
„Управата за јавни приходи, апелира до граѓаните кои оствариле доход во земјава или странство во вид на пари, хартии од вредност, натура или друг вид на доход и сèуште не се регистрирани на системот е-Даночни услуги, за да ги исполнат своите обврски за пријавување и плаќање на данок, истото да го сторат во најкраток можен рок. За дополнителни информации околу исполнувањето на обврските за пријавување на доход, плаќање и враќање на данок можете да се обратите на [email protected], или на некој од контакт телефоните во контакт центарот 02 3253 200 или на 0800 33 000 само од фиксни оператори“, се додава во соопштението.
ИЗВОР: racin.mk
