УЕФА објави дека изрекува казна од 15.000 евра и делумно затворање на дел од јужната трибина на „Сантијаго Бернабеу“, што засега е условно. Причината за ова е расистичко и/или дискриминаторско однесување од страна на навивачите на тимот за време на реваншот од плејофот на Лигата на шампионите против Бенфика. Доколку таквото прекршување се повтори во рок од една година, 500 седишта во еден од секторите во споменатиот дел од стадионот ќе бидат затворени.
Натпреварите меѓу Реал и Бенфика беа обележани со проблемот на расизмот. За време на првиот натпревар, Винисиус Жуниор се пожали дека бил расистички навредуван од Џанлука Престијани, а Бенфика ги казни своите навивачи за слични навреди упатени кон Бразилецот.
Ова предизвика широк меѓународен одѕив. Истрагата за големиот скандал е сè уште во тек, а Реал Мадрид го посвети реваншот на борбата против расизмот, со голем транспарент на кој пишуваше „Не на расизмот“ на „Сантијаго Бернабеу“. Иронијата беше што во тој момент, камера сними навивач на Реал Мадрид како упатува нацистички поздрав. Тој веднаш беше отстранет од стадионот.
УЕФА не прецизираше дали токму овој чин бил причина за казната на Реал Мадрид.
Извор: vecer.mk
