Косовската полиција објави дека мажот – државјанин на Република Северна Македонија бил пронајден мртов во автомобил со македонски таблици, а на еден километар оттаму е пронајдено запалено возило со германски таблички. Во запаленото возило се најдени два калашникови со кои се претпоставува дека е извршено убиството
Убиениот во синоќешното пукање во Приштина е македонски државјанин, потврди косовската полиција.
Во соопштението на полицијата на Косово се додава оти мажот бил пронајден во возило со македонски регистарски ознаки, а на околу еден километар од местото на инцидентот е пронајдено запалено возило со германски таблички. Во запаленото возило се пронајдени два калашникови со кои се претпоставува дека е извршено убиството на македонскиот државјанин.
Полицијата засега нема информации за идентитетот на сторителот или сторителите на убиството.
„Надлежни полициски единици излегоа на местото на настанот, каде што забележаа дека во возило со македонски регистерски таблички се наоѓа едно лице, а надлежен лекар констатира дека лицето нема знаци на живот. Околу еден километар од местото на настанот е пронајдено запалено возило со германски таблички, за кое постои сомневање дека осомничените побегнале од местото на настанот“,
се вели во соопштението.
Косовскиот портал „Индекс онлајн“ доцна синоќа објави и детали, вклучително и идентитетот и фотографија од убиениот. Повикувајќи се на свои извори, тие наведоа дека убиеното лице е со иницијали Б. Д., имал лажни документи кои ги користел и гласеле на име Блерим Шабани.
ИЗВОР: 360stepeni.mk
