РАМАЛА (АА) – Убиени се 103 Палестинци во серијата одмазднички израелски напади врз окупираниот Западен Брег, од 7 октомври досега, објави палестинското Министерство за здравство, јавува Анадолу.
„Четворица Палестинци се убиени утринава од истрели и проектили на окупациските сили, од кои тројца се убиени во Џенин, а еден во Калкилија“, соопшти Министерството.
Израелските воени сили влегоа во Калкилија и извршија претреси од куќа до куќа, што резултираше со судири со десетици Палестинци. Војската користела боева муниција и гумени куршуми за време на конфликтот, изјавија очевидци за Анадолу.
Медицински извори, исто така, потврдија за палестинската новинска агенција ВАФА дека 19-годишниот Калед Салам Факха од градот Анабта во источниот дел на Тулкарм им подлегнал на повредите предизвикани од истрелите од израелската Армија седум дена претходно.
Управата за прашања на палестинските затвореници и Клубот на палестинските затвореници вчера објавија за смртта на палестински затвореник во израелски затвор, што е втор ваков случај за помалку од 24 часа.
Западниот Брег е сведок на бран судири меѓу Палестинците и израелската Армија додека израелската операција се интензивира и хуманитарната ситуација се влошува во Појасот Газа.
Израел ја бомбардира Газа по ненадејниот напад на Хамас на 7 октомври, ставајќи ја целата енклава под блокада, поради што 2,3 милиони жители се со малку вода, гориво и медицински материјали.
Израелската војска продолжи со своите интензивни воздушни напади врз Газа, во кои уништи цели квартови.
Во израелските напади на Газа убиени се 5.791 Палестинец, од кои 2.360 се деца, 1.292 жени и 295 стари лица.
