Тамам ги заборавивме унгарските милијарди, ете ни нови. Шест. Овојпат британски, со Договор за стратешко парнерство, што ја прави Севрна Македонија прва земја на Балканот која склучува Договор за стратешко партнерство со Велика Британија, пишува Радио Слободна Европа.
Анализата е дамо една многубројните што на крајот на оваа недела, откако во Лондон беше потпишан договорот, но заедничко за сите е што овој договор, како и на почетокот на унгарскиот заем, има многу прашалници, односно непознати
Како што е познато, првата вест и подадените раце за овој аранжман со Обединетото Кралство дојде од Тирана, на средбата на Христијан Мицкоски со британскиот премиер Кир Стармер, откако ден пред тоа нашиот премиер најави „историски ден за Македонија“.
Една недела подоцна, односно во четвртокот во Лондон, параф на овој договор стави Александар Николоски, кој со тој чин се стекна со убава функција – вицепремиер задолжен за задолжувања со милијарди евра.
Но, освен фотографии и подавање рака, како што нотираат и од Радио Слободна Европа, други детали за договорот, од оние најважните – нема.
Македонија влегува во должнички вител
Иако е познато дека грејс периодот за отплата ќе започне по завршувањето на проектите, сè уште нема детални информации за условите на кредитот, како каматните стапки и роковите на враќање.
Поради тоа опозицијата ја критикуваше Владата за недостиг на транспарентност, а лидерот на СДСМ, Венко Филипче, предупреди дека ова задолжување ќе ги врзе идните генерации, додавајќи дека секое новороденче ќе должи по 6.000 евра, а јавниот долг ќе надмине 115%, што според него е полошо и од грчката криза.
Во сличен тон се и опсервациите на „Независен“.
Колегата Љупчо Поповски прво се прашува дали ова ново задолжување од 6 милијарди евра е 1199. проект што не беше наведен во изборната програма на ВМРО-ДПМНЕ, бидејќи гласачите би биле сериозно вознемирени кога би им се претставиле задолжувања (а не инвестиции) од шест милијарди евра. И унгарските пари –кредитот од една милијарда евра – премиерот Христијан Мицкоски ги објави ден по изборната победа, а не се размавнуваше со неа во предизборието. Значи, со тајниот проект, Македонија е на патот да влезе во должнички вител.
И Рацин.мк пишуваше на нецелисходноста од ова задолжување, настрана непознатите фактори за условите под кои ни се одобрува, од аспект на тоа дека на нашата земја за инфраструктурни поекти од европско значење и стојат на располагање милијарди евра од ЕУ фондовите. Само треба(ше) да го започнеме отворањето на кластерите во рамките за преговорите за членство во ЕУ.
Ако Македонија ги почнеше пристапните преговори со ЕУ, тоа многу веројатно ќе ѝ донесеше значителна финансиска поддршка за изградба на пругата на Коридорот 10, особено ако проектот е дел од Трансевропската транспортна мрежа (TEN-T), како што тој навистина е. Сега Наместо европска пруга со ЕУ грантови, ќе добиеме британски скапа, пишува во текстот со тој наслов колегата Љубиша Николовски.
Николоски испорачува секаде
Но, интересно е да се навратиме на анализата на Љупчо Поповски за „Независен“, кој дијагностицира дека вицепремиерот и министер за транспорт и врски Александар Николоски испорачува и е таму каде што местото би им било на други министри.
На пример, потсетува „Независен“, на 15 мај Николоски по кој знае кој пат беше во Будимпешта. Министерството за транспорт објави дека таму се сретнал со министерот за одбрана, Кристоф Салај Бобровнички.
Средбата изгледа необјаснива. На неа се разговарало за соработка меѓу двете земји во одбранбениот сектор. Министерот за одбрана Владо Мисајловски (исто така, потпретседател на ВМРО-ДПМНЕ), како да е во длабока илегала. Владата и неговата партија не го вадат од уста НАТО (како тие да ја внесоа земјата во Алијансата), а Мисајловски кон сето тоа како да се однесува незаинтересирано. Па, гледа како министерот за транспорт разговара во Будимпешта за соработка во одбранбената индустрија. Ако навистина тоа била целта на оваа посета на Николоски на Будимпешта, се прашува Поповски.
Во оваа анализа „Незавсен“ укажува и на тоа дека Александар Николоски ги врши работите и на министерот за надворешни работи и меѓународна трговија Тимчо Муцунски.
Документите кои го цементираа стратешкото партнерство со САД одеа преку Министерството за надворешни работи (Муцунски нека го праша Антонио Милошоски), а сега таков договор ќе потпишува министерот за транспорт (без оглед на намерите за изградба на пругата). Па уште влада да носи специјална одлука дека го испраќа Николоски во Лондон да ја заврши работата, пишува во анализата.
И за време на посетата на владината делегација на Емиратите, Николоски (покрај премиерот Мицкоски) ги објаснуваше деталите за идната соработка меѓу двете земји и за можните инвестиции. Во туризмот, инфраструктурата и образованието. Тој ги заменува сите, а не само Муцунски. На самитот на Европската политичка заедница во Тирана заедно со Мицкоски беше Николоски, а не Муцунски. На овој голем дипломатски собир шефот на македонската дипломатија беше оставен во Скопје да ја пречека министерката за надворешни работи на Австрија.
ИЗВОР: racin.mk
