Осум лица се уапсени по синоќешните инциденти за време на прославата на Денот на албанското знаме, информираше министерот за внатрешни работи Панче Тошковски. Според него уапсените се наоѓаат во полициска станица и сите тие се млади лица. Тошковски најави дека за сите тие ќе бидат поднесени кривични пријави, а рече дека се можни и дополнителни приведувања.
„Четири од тие лица се уапсени заради тоа што сториле прекршок учество во тепачка, а други четири лица се уапсени заради тоа што за нив имаме основано сомневање дека сториле кривично дело од 319 од Кривичниот законик, кое се однесува на, да сме прецизни, предизвикување национална, расна и верска омраза, раздор и нетрпеливост каде што е предвидена минимална казна од една година затвор“, рече Панче Тошковски.
Најостро го осудувам настанот кој претставува чин на агресија и ова се случува поради тоа што правдата полека но сигурно се приближува кон криминалците, рече премиерот Христијан Мицкоски. Истакна, дека на секој ваков потег жестоко ќе биде одговорено, без оглед на нивната национална припадност.
„Ваков тип на обиди за ескалација на случувањата и креирање на етнички тензии дека ќе има и ќе има и во иднина ако мислите дека ова ќе биде изолиран случај, нема да биде очекувајте дека ќе има и во иднина бидејќи како правдата како полека но сигурно се доближува до криминалците и како правдата ќе затропа на нивните врати така тие ќе стануваат понервозни. Македонската Влада ќе одговори жестоко на сите провокации и обиди да се дестабилизира мирот и безбедноста во државата“, рече Мицкоски.
Од ДУИ ги осудија случувањата, велат дека се работи за изолирани инциденти и дека за тоа што се случи е одговорна Владата за која рече дека постојано и се случуваат вакви настани во последниот период.
„Во делот на индивидуалните акти секако дека се за осуда обемно за сите страни кои се вклучени. Политичките партии, политичарите треба да даваат позитивни пораки а не да даваат пораки на поделба на поларизација. Ние вакви настани во последните 7 – 10 години, речиси немавме во нашата држава а за жал во последните неколку месеци се почесто се случуваат вакви настани.“, рече Бектеши.
Од СДСМ оценуваат дека безбедносниот систем потфрлил за што побараа оставки од министерот за внатрешни Тошковски како и директорот на Бирото за јавна безбедност Александар Јанев и првиот човек на СВР Скопје Сашо Топаловски.
„Зошто МВР немаше навремени оперативни информации за да се делува превентивно и ова да не се дозволи? Што работат АНБ и БЈБ и како се дозволи да ескалира состојбата до ова ниво? Зошто дозволија вакво понижување на Македонците и македонската држава?Понатаму, зошто не се приведени оние кои пукаа и користеа огнено оружје во центарот на Скопје?“, прашува Костовски.
Со реакција се јавија и од коалицијата ВРЕДИ од каде најостро ги осудија случувањата со палењето на државните знамиња. Повикуваме на разумност и меѓусебно почитување, бидејќи палењето на знаме е подгревање на меѓуетничките односи во оваа земја. Чувствуваме одговорност и апелираме до сите граѓани да покажат разумност и решителност да не станат плен на злонамерни провокации, се вели во реакцијата на ВРЕДИ.
ИЗВОР: ТВ 21
