АНКАРА (АА) – Израел од почетокот на август изврши воздушни напади врз 13 засолништа во Газа, каде што се засолнети раселените Палестинци, изјави денес портпаролот на Цивилната одбрана во опколената палестинска енклава, јавува Анадолу.
Последниот напад се случи рано утрово кога израелската војска го бомбардираше училиштето Ал-Таба’ин во населбата Ал-Дараџ, во источниот дел на градот Газа, при што загинаа најмалку 100 Палестинци.
На прес-конференцијата, Махмуд Басал, портпаролот на Цивилната одбрана во Газа, рече дека во израелскиот напад врз училиштето Ал-Табаин погодени биле два ката, на едниот кат живееле жени, а другиот кат служел како соба за молитва за раселените цивили.
Овој напад резултираше со бројни жртви, а многу лица сè уште не се регистрирани, додаде тој.
„Бараме светот веднаш да интервенира за да ги запре масакрите врз беспомошните цивили во засолништата“, порача Басал.
Претходно, владината Канцеларија за медиуми во Појасот Газа соопшти: „Израелската армија директно ги таргетираше раселените цивили додека ја извршуваа утринската молитва, (што) доведе до брз пораст на бројот на жртви.“
И покрај апелите во четвртокот од посредниците Египет, САД и Катар да се запрат непријателствата, да се постигне прекин на огнот и договор за размена на заложници, Израел продолжува со својата смртоносна офанзива во Појасот Газа.
Во израелската офанзива врз Газа од октомври минатата година убиени се речиси 39.700 Палестинци, главно жени и деца, а над 91.700 се повредени.
Повеќе од 10 месеци од почетокот на израелската војна огромни делови од Газа се во урнатини, а постои и блокада за храна, чиста вода и лекови.
Израел е обвинет за геноцид пред Меѓународниот суд на правдата, кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.
Извор: Anadolu Agency (AA)
