Бобан Трпковски, инструктор за заштита од пожари, денеска во „Daily CLick“ на ТВ21 ја истакна важноста на правилната изградба на објектите и примена на стандардите за безбедност од пожари.
Како што вели, јасно се гледа дека пожарот во Кочани, каде загинаа 62 лица, е настанат од пиротехника, но лошото во целата работа се вградените материјали кои се од лесно запалива природа.
„Видовме колку брзо пламна сето тоа, ајде малку стручно, кога пожарот е во таванската просторија или во таа зона на висок притосок, брзо се шири на таванот. Затоа ние имаме толкав број на повредени и на загинати. Да не зборувам за влезовите и излезите колку треба да има“, вели Трпковски.
Како што вели, сето тоа од противпожарна гледна точка не ги исполнува никакви услови за работа во таа дејност.
„Од мои колеги слушнав дека имало доста од жртвите во санитарните простории, каде што пробале да се спасуваат, каде што не биле изгорени туку само задушени, што е знак дека многу брзо може да настрада од вакви ситуации… Ако хипотетички претпоставиме дека бил изграден со соодветни материјали, како би се одвивала ситуацијата? Доколку би била вградена опрема која треба да биде за стандардите, алармите за пожари тие мора да дејствуваат во 5-тата и 14-тата секунда. Доволно е само алармот да им каже на луѓето дека треба да почнат да излегуваат. Од самите снимки некои се забавуваа на таа сцена, не ја сфатија сериозноста на пожарот. Порано пред 40 години кога имавме други материјали, им требаше меѓу 15 и 17 минути, мешѓутоа сега со новиве типови на материјали кои ги вградуваат во нашите дневни соби или во становите, треба меѓу 3 и 5 минути да изгоре“, вели Трпковски.
ИЗВОР: ТВ 21
