Тројцата припадници на косовската полиција уапсени во Србија ќе се бранат од слобода

Обвинението е потврдено, а притворот е укинат и ќе се бранат од слобода, вели адвокатот од Белград кој ги застапува уапсените косовски полицајци во Србија

Тројцата припадници на косовската полиција, кои беа уапсени на 14 јуни во Србија, се ослободени, пренесува регионалниот сервис на Радио Слободна Европа.

Адвокатот од Белград, Градимир Налиќ, кој ги застапува уапсените косовски полицајци во Србија, потврди за РСЕ дека им е укинат притворот и дека, како што изјави, тие се ослободуваат.

„Обвинението е потврдено, а притворот е укинат и ќе се бранат од слобода“,

вели Налиќ и додаде дека полицајците се враќаат на Косово.

Тој додава и дека „во интерес на клиентите“ не може да каже ништо повеќе за овој случај.

Во соопштението што го пренесе РТС, се наведува дека по спроведената претходна постапка и покренато обвинение од страна на Вишото јавно обвинителство Краљево против осомничените Б. С., Р. З. и Ш. М. за кривичното дело недозволено изработување, држење, носење и тргување со оружје и распрскувачки материи од Кривичниот законик, неистражниот совет на Вишиот суд во Краљево го потврдил обвинението против горенаведените обвинети и донел решение со кое на обвинетите им е укинат притворот.

По апсењето на косовските полицајци на 14 јуни, Приштина тврдеше дека полицајците биле киднапирани од територијата на Косово, а од Белград велеа дека биле уапсени на територијата на Србија.

Како што претходно соопштија српските власти, тие се осомничени дека сториле кривично дело недозволено изработување, држење и тргување со оружје и распрскувачки материи, за кое е предвидена казна затвор до 12 години.

По апсењето следуваа бројни апели од меѓународната заедница за ослободување на полицајците. Албанскиот премиер Еди Рама посочи дека односите меѓу Албанија и Србија ќе се вратат на нула доколку Белград не ги ослободи тројцата косовски полицајци кои беа уапсени од српската полиција.