Со триминутен молк стотици скопјани се простија од 22-годишната Фросина Кулакова, која трагично го загуби животот на „Партизанска“…
Кобниот инцидент се случи на 29-ти вечерта, кога Фросина поминувала на пешачкиот премин. Во неа со возило удрил 20-годишник.
„Не мислам дека местото е кобно колку што луѓето се кобни коишто не внимаваат и не се грижат едни за други. Тоа што може да се направи, освен тоа што луѓето сами треба да имаат свест за тоа како возат, секако и пешаците како поминуваат, е надлежните да преземат нешто со ваквите случаи за да може ние во иднина да се чувствуваме посигурни“, изјави граѓанин.
Во притвор заврши В.Ј. кој возел со 130 километри на час, поминал на црвено светло на семафорот, немал ниту возачка дозвола, а бил и под дејство на алкохол. Присутните беа гневни, зашто возачот бил од претходно познат на правосудните органи.
„Во иднина да се поведе сметка со милицијата, а и децата да се воспитаат како што треба, а не без дозвола да им се дава кола. Жалосно е за детето што ќе лежи, но правдата мора да биде излезена“, изјави граѓанин.
„Ова е апел, крик до органите, вакви личности коишто континуирано го повредуваат законот да бидат отстранети од општеството за да не бидат опасност за другите граѓани“, вели друг граѓанин.
„Институциите не си ја вршат работата како што треба да ја вршат и вината покрај дечкото што возел е кривица на целиот систем, па би рекла и на сите ние што не се буниме и редно време е да реагираме на вакви ситуации, заради тоа што неказниво е поминато“, рече граѓанин.
Фросина беше студентка на Интернационалниот институт за мода „Изет Цури“ и со потекло од Неготино, каде исто така се организира протест. Се огласи и министерот за внатрешни работи Панче Тошковски, кој напиша дека настанот е резултат на пропусти во системот што дозволува рецидивистите да останат надвор од контролата на институциите.
ИЗВОР: ТВ 21
