Три закони од областа на образованието денеска го поминаа комисискиот филтер. Членовите на собраниската Комисија за образование, наука и спорт дадоа поддршка за Предлог законот за престанување на важењето на Законот за основање на Национална агенција за нуклеарни технологии на Република Македонија, Предлог законот за Националната рамка на квалификации и Предлог законот за учебници во основно и средно образование кои се проследуваат на натамошна постапка.
За Предлог законот за учебници во основно и средно образование во второ читање беа поднесени вкупно 13 амандмани од кои дел повлечени, а дел отфрлени. Беше прифатен само еден амандман од ВМРО-ДПМНЕ со кој се предвидува учебникот да не смее да содржи рекламни пораки, огласи или содржини кои промовираат дискриминација по било која основа за дискриминација предвидена во Законот за спречување и заштита од дискриминација.
За Предлог законот за Националната рамка на квалификации беа поднесени неколку комисиски амандмани кои не добија поддршка, а за Предлог на законот за престанување на важењето на Законот за основање на Национална агенција за нуклеарни технологии на Република Македонија не беа поднесени амандмани.
Предлог законот за средно образование, неодамна Владата го повлече.
ИЗВОР: racin.mk
