Во емисијата „Бизнис21“ на ТВ21 вчера гостуваа Слободан Трендафилов, претседател на Сојузот на синдикатите на Македонија (ССМ), и Благоја Ралповски, претседател на Конфедерацијата на слободни синдикати (КСС), каде главна тема на дебатата беше зголемувањето на минималната плата.
Трендафилов истакна дека минималната плата во Македонија е на исклучително ниско ниво, а според последните податоци, таа „го пробушила дното“. Според него, стратегијата на Владата не смее да биде одржување на работниците во сиромаштија, со што индиректно се обезбедуваат политички поени.
Тој додаде дека пратениците сега признаваат дека и минимална плата од 500 евра е недоволна за пристоен живот, што го сфатиле по неговиот предлог именуваните функционери да живеат со минимална плата во наредниот период.
„Пратениците почнаа да кукаат дека е тешко да се живее со 500 евра, а што да кажат работниците кои земаат 395 евра?“, праша Трендафилов, додавајќи дека владејачките структури покажале себичност кога се работи за работничките права – ги задржале патните трошоци и ги зголемиле своите плати за 78%, додека работниците останале со минимални примања.
Дополнително, Трендафилов посочи дека Македонија е трета земја во Европа каде Владата се обидува да ги потисне синдикатите и да ги елиминира од синдикалната сцена. Според него, социјален дијалог за минимална плата не се води само во Белорусија и Молдавија.
Од друга страна, Ралповски го доведе во прашање барањето на ССМ за минимална плата од 500 евра, барајќи појаснување за основата на оваа сума. Тој нагласи дека почитувањето на законите е клучно за континуиран раст на платите и обвини дека одредени синдикални активности во минатото биле популистички.
Во текот на дебатата, двајцата синдикални лидери разменија жестоки аргументи околу улогата на синдикатите во борбата за повисоки плати, при што Трендафилов истакна дека платите во јавниот сектор почнале да растат токму поради притисокот од ССМ.
Ралповски возврати дека зголемувањето на платите не е заслуга само на ССМ, туку и на другите синдикати кои се бореле преку штрајкови и протести.
Во однос на зголемувањето на минималната плата, Ралповски нагласи дека законските одредби мора да се почитуваат и дека минималната плата треба да се усогласува според утврдени економски механизми, а не врз основа на политички одлуки или популистички притисоци.
Трендафилов, пак, предложи зголемување на платите за 6.000 денари со тоа што Владата ќе ги субвенционира придонесите на работодавачите. Според него, Владата не треба да тврди дека нема средства, бидејќи тие пари ќе останат во буџетот.
На крајот од дебатата, Ралповски најави дека просветните работници ќе добијат зголемување на платите од 7%, што ќе изнесува околу 4.000-4.500 денари.
Дебатата во „Бизнис21“ покажа дека и покрај заедничката цел за подобрување на работничките права, синдикатите остануваат поделени во пристапот и стратегијата за зголемување на минималната плата.
ИЗВОР: ТВ 21
