Доналд Трамп денес ќе одржи специјално претседателско обраќање во Овалната соба, додека се зголемуваат шпекулациите за тоа каква би можела да биде содржината на неговиот говор.
Изненадувачкото обраќање е закажано за 14 часот по локално време (19 часот по централноевропско време), но засега нема повеќе детали за темата, објавува „Мирор“.
Некои политички коментатори веруваат дека денешната најава најверојатно ќе биде поврзана со можното распоредување на Националната гарда во Чикаго, откако нејзините трупи неодамна беа стационирани во Вашингтон.
Трамп во неделата предупреди дека би можел да ја испрати воената формација со федерално седиште во третиот по големина град во Америка.
Обраќањето доаѓа откако Доналд Трамп, 79, ги отфрли деновите на шпекулации за неговото здравје, предизвикани од фотографиите на кои се гледаат темни модринки на задната страна од неговата рака. Во кратка објава на Truth Social во неделата навечер, тој напиша: „НИКОГАШ НЕ СУМ ЧУВСТВУВАЛ ПОДОБРО ВО МОЈОТ ЖИВОТ“.
Извор: tv21
