Трамп: Следната недела можен е договор за прекин на огнот во Газа по „позитивниот“ одговор на Хамас

АНКАРА (АА) – Американскиот претседател Доналд Трамп изјави дека следната недела можно е да се постигне договор за прекин на огнот меѓу Израел и Хамас, по она што го опиша како „позитивен“ одговор од палестинската група на отпорот на предлогот на САД, објавија медиумите, пренесува Анадолу.

„Може да има договор за прекин на огнот во Газа следната недела“, изјави Трамп за новинарите на авионот „Ер Форс Уан“, додавајќи дека сè уште не е информиран за статусот на преговорите, според „Араб њуз“.

Хамас соопшти дека „го доставил својот позитивен одговор“ до египетските и катарските медијатори и дека е „целосно подготвен веднаш да влезе во рунда преговори во врска со механизмот за спроведување на оваа рамка“.

Официјален претставник на Хамас изјави дека групата бара гаранции за целосно повлекување на израелските сили и траен прекин на огнот.

Трамп наводно ветил дека 60-дневниот прекин на огнот може да се продолжи доколку е потребно.

Напорите за прекин на огнот доаѓаат во услови на континуирани израелски напади.

Најмалку 20 Палестинци се убиени во текот на вчерашниот ден додека при обид да дојдат до хуманитарна помош, соопштија надлежните во болницата „Насер“ во Кан Јунис.

Обединетите нации (ОН) истакнаа дека 613 Палестинци се убиени во последниот месец додека барале храна.

Во израелските воздушни напади врз областа Муваси во Газа убиени се 15 лица, меѓу кои осум жени и едно дете, според болнички извори. Израелската војска соопшти дека ги разгледува инцидентите.

Израелските напади започнаа кога припадници на Хамас упаднаа во Израел, според наводите убивајќи 1.200 луѓе и земајќи околу 250 заложници, на 7 октомври 2023 година.

Здравствените власти во Газа изјавија дека оттогаш се убиени повеќе од 57.000 Палестинци.

И покрај меѓународните повици за прекин на огнот, Израел спроведува геноцидна војна врз Газа, убивајќи повеќе од 57.200 Палестинци, повеќето од нив жени и деца, од крајот на 2023 година.

Меѓународниот кривичен суд минатиот ноември издаде налози за апсење за израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за своите воени дејства во енклавата.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.