ИСТАНБУЛ (АА) – Американскиот претседател Доналд Трамп ги засили критиките кон рускиот претседател Владимир Путин, нарекувајќи го „луд“ и предупредувајќи дека секој негов обид за освојување на цела Украина „ќе доведе до пропаст на Русија“, јавува Анадолу.
„Отсекогаш сум имал многу добри односи со Владимир Путин од Русија, но нешто му се има случено. Тој целосно полуде!“, напиша Трамп на својата платформа „Трут сошал“, откако им кажа на новинарите во Њу Џерси дека „не е среќен“ поради смртоносните ракетни напади на Русија врз украинските градови и дека размислува за нови санкции кон Москва.
„Тој непотребно убива многу луѓе, а не зборувам само за војници. Ракети и беспилотни летала врз градовите во Украина, без никаква причина“, рече тој.
Претходно, Трамп изјави пред новинарите: „Ние сме среде разговори, а тој стрела ракети во Киев и други градови. Воопшто не ми се допаѓа“, додавајќи дека „апсолутно“ размислува за санкции.
Најмалку 12 лица беа убиени вчераутро во Украина по големите напади со руски беспилотни летала врз земјата разорена од војна втора ноќ по ред, додека Москва и Киев продолжуваат да разменуваат обвинувања за воздушните напади.
Трамп го нападна и украинскиот претседател Владимир Зеленски, велејќи дека неговата реторика е бескорисна.
„Зеленски не ѝ прави услуга на својата земја зборувајќи на тој начин. Сè што излегува од неговата уста предизвикува проблеми. Не ми се допаѓа и подобро е да престане“, рече тој.
Окарактеризирајќи ја тековната војна како резултат на „голема некомпетентност и омраза“, Трамп рече дека „ова е војна што никогаш немаше да започне ако јас бев претседател. Ова е војна на Зеленски, Путин и (поранешниот американски претседател Џо) Бајден – не на ‘Трамп’. Јас само помагам да се изгаснат големите и грди огнови“.
Минатата недела за време на телефонски разговор со европските лидери, Трамп рече дека Путин не е подготвен да ја заврши војната во Украина бидејќи верува дека победува, објави „Волстрит џурнал“.
Извор: Anadolu Agency (AA)
