Трајановски: Обезбедени се 44 милиони денари за санација на регионален пат

Денеска заедно со градоначалникот на општина Кавадарци Митко Јанчев, Претседателот на Совет Стојанче Рамов, заменик директорот на ЈП Македонијапат Александар Шуковски и стручниот тим од ЈПДП извршивме увид во градежните активности на регионалниот пат Р29171 кој води од Демир Капија, преку Крњево и Конопиште, до месноста Мушов Гроб со приближна должина од 40 km, и е значаен за локалното население кое секојдневно сообраќа по него, објави Коце Трајановски, директор на Јавно претпријатие за државни патишта.

„Токму затоа, водејќи се од грижата за учесниците во сообраќајот како и од фактот дека овој регионален пат децении наназад бил запоставуван, Јавното претпријатие за државни патишта во соработка co локалната самоуправа од Кавадарци, отпочна со градежни активности за санација на коловозот на делот од делницата од Мушов гроб до Конопиште во должина од 6,5 километри и со просечна ширина од 4,2 метри“, потенцира Трајановски.

„За оваа намена издвоени се финансиски средства во износ од 44 милиони денари обезбедени од Програмата за одржување на државните патишта на ЈПДП која се спроведува преку ЈП за одржување и заштита на магистралните и регионалните патишта „Македонијапат“.

Средствата ce наменети за санација и рехабилитација на коловозот со вградување на нов асфалтен слој при што е планирано да се вградат вкупно 3.500 тони асфалт. До овој момент се завршени околу 2 км од вкупните предвидени 6,5 км, а поставени се 6 пропусти, извршени се ископи за нови канафки, проширување на трупот на патот и негово тамопнирање.

Работите кои ги изведува ЈП Македонијапат ако нема промена во временските услови очекуваме целосно да бидат завршени во следните 15 дена“, потенцира Трајановски.