Шеснаесетгодишно момче извршило самоубиство откако од вештачката интелигенција „ChatGPT“ побарало совет за „најсигурниот“ начин да си го одземе животот, беше соопштено за време на судската истрага. Лука Чела Вокер, ученик во приватно училиште од Хемпшир, починал на 4 мај минатата година. На рочиштето во судот во Винчестер во вторникот беше изнесено дека неколку часа пред смртта, тој пребарувал на „ChatGPT“ за „најуспешниот“ начин на кој едно лице може да се самоубие на железничка пруга, пренесува Guardian.
Во моментот на смртта, тој посетувал колеџ во Фарнборо, а претходно завршил школување во близина на Хук. Судот слушна сведоштва дека во тоа училиште владеела култура на насилство — „или малтретираш, или си малтретиран“ — што оставило значителни последици врз неговото ментално здравје. Семејството го опишува како „добро, чувствително и смирено“ момче. На родителите им рекол дека оди на работа како спасувач, но наместо тоа заминал на железничката станица каде што го извршил чинот. Неговите родители, Скот Вокер и Клер Чела, изјавија пред судот дека не биле свесни за проблемите на нивниот син, опишувајќи ги како „невидлива борба“.
Детективот Гари Најт од британската сообраќајна полиција, кој ја водел истрагата, изјави дека е утврдено дека Лука ноќта пред смртта, околу 00:30 часот, го користел ChatGPT барајќи совети за начини на самоубиство на железница.
„Системот нуди можност да го упати корисникот до организации за помош, но Лука тоа го заобиколил, по што ChatGPT му дал информации за најефикасните начини“, рече Најт, додавајќи дека станува збор за „вознемирувачка и потресна содржина“.
Извор: vecer.mk
