Министерот за внатрешни работи, Панче Тошковски, информираше дека дојавите за бомби, упатени кон училишта низ земјата минатиот петок, биле испратени од привремени емаил адреси кои се бришат само еден час по испраќањето на заканувачките пораки. Тоа ја отежнува идентификацијата на лицето што ги испратило.
Во интервју за 360 степени, Тошковски истакна дека овие закани се дел од хибридни напади кои, иако се лажни, бараат сериозна реакција од страна на Министерството за внатрешни работи и темелна проверка на наводите.
„Овие закани не се првпат да се случуваат, и како што се покажа и претходно, се покажале лажни. Последните дојави беа испратени од привремени емаил адреси, создадени од лица со недобронамерни намери. Според информациите што ги добив, овие адреси се бришат за еден час по испраќањето на пораките, што го отежнува откривањето на испраќачот“, рече Тошковски.
Тој исто така напомена дека формирањето оперативен штаб за справување со дојавите за бомби донел препораки за Министерството за образование и образовните институции, во врска со заштитата на училишните простори, особено во времето кога нема ученици.
„Полицијата ја зголеми присутноста со патролирање околу училиштата, а дадовме препораки за подобрување на техничката безбедност и за зголемено внимание на чуварските служби“, додаде министерот. „Во иднина, полицијата ќе реагира посоодветно на вакви ситуации, со разлики во одговорот на предизвиците, според тоа како се реагирало во минатото.“
Тошковски потврди дека сите досегашни дојави се лажни, но нагласи дека Министерството за внатрешни работи ќе продолжи да ги проверува сите наводи, бидејќи сериозноста на заканите бара одговор.
ИЗВОР: ТВ 21
