Министерот за внатрешни работи Панче Тошковски денеска, заедно со претседателот на Републичкиот совет за безбедност на сообраќајот на патиштата (РСБСП), Горан Ангеловски, присуствуваше на предавање на нова опрема за сообраќајната полиција.
Полицијата доби 23 мотоцикли „Piaggio“ со 310 cm³ моќност во полициска изведба, како и комплетна возачка опрема – одела, кациги, ракавици и чизми.
„Ова е уште една потврда за успешната соработка помеѓу МВР и РСБСП, партнерство кое директно придонесува за зголемување на безбедноста на патиштата,“ изјави Тошковски, нагласувајќи дека заедништвото и координацијата се клучни за подобри услови за работа на полициските службеници и поголема сигурност за сите учесници во сообраќајот.
Тој додаде дека министерството ќе продолжи со иста посветеност, бидејќи безбедноста во сообраќајот останува врвен приоритет.
