Градоначалникот Тони Тоневски оствари работна средба со активисти од здружението „Вита-Максима“, посветена на актуелната состојба со бездомните животни и можностите за унапредување на постапките за нивно хумано заловување и згрижување.
На средбата била споделена иницијативата за изградба на регионален стационар за бездомни миленици, проект кој, според Тоневски, ќе претставува одржливо и системско решение за проблемот со кучињата скитници на ниво на целиот регион.
„Овој проект ќе биде дополнително разработен во наредниот период и има за цел да обезбеди хуман третман и подобра контрола на популацијата на бездомни животни“, истакна тој.
Во соработка со здружението и ветеринарните станици, општината планира во втората половина од годината да обезбеди конкретна поддршка за стерилизација на домашните миленици – мерка што се смета за клучна во превенцијата на појавата на нови бездомни животни.
Тоневски нагласи дека преку координирана работа со граѓанскиот сектор и стручните служби може да се изгради похумана и побезбедна средина и за граѓаните и за животните.
Средбата со „Вита-Максима“ беше оценета како конструктивна и плодна, со заедничка заложба проблемот со бездомните животни да се решава системски и долгорочно.
Извор: zurnal.mk
