Тим правни експерти: Многу е веројатно Русија да ја разнела браната „Нова Каховка“

Правните експерти ја отфрлија теоријата дека катастрофата можела да биде предизвикана само од лошо управување со браната

Тим правни експерти кои го истражуваат уништувањето на браната Нова Каховка изјавија дека е „многу веројатно“ Русија да е одговорна за инцидентот што ја предизвика големата поплава. Според прелиминарните наоди, Русија најверојатно поставила експлозиви на браната, според истражителите од меѓународната адвокатска фирма за човекови права „Глобал Рајтс Комплианс“, која им помага на украинските обвинители.

Тие го посетија регионот Херсон на 10 и 11 јуни со тим од Меѓународниот кривичен суд и украинскиот државен обвинител. Меѓу нив беше и Јусуф Сајед Кан, адвокат во „Глобал Рајтс Комплианс“, кој рече дека наодот дека браната била урната со експлозив претходно поставен од руска страна е „утврден со веројатност од 80 отсто и повеќе“.

Тие ја отфрлија теоријата дека катастрофата можела да биде предизвикана само од лошо управување со браната.

Русија и Украина разменија обвинувања за пробивањето на браната претходно овој месец, но експертите го вперија прстот кон Москва.

Инспекторите рекоа дека уништувањето на браната може да претставува кривично дело изгладнување и може да биде дел од поширокото злосторство против човештвото, но групата сè уште не ја донела таа одлука.