АНКАРА (АА) – Јужна Кореја денес соопшти дека Северна Кореја истрелала повеќе крстосувачки ракети кон Жолтото Море, меѓу Кина и Корејскиот Полуостров, пренесува Анадолу.
Лансирањето се случило околу 4:00 часот по локално време, соопшти Здружениот Генералштаб на Јужна Кореја, кој не даде повеќе детали.
„Нашата војска го зајакна надзорот и будноста на границите и тесно соработува со Соединетите Американски Држави“, објави Генералштабот на Фејсбук.
Ова се случува само неколку дена откако Јужна Кореја и САД ја завршија 11-дневната заедничка воена вежба што Пјонгјанг ја нарече „агресивна воена вежба која претставува сериозна закана“.
За време на воените вежби „Штитот на слободата“ што завршија во четвртокот, војската на САД и Јужна Кореја одржаа заеднички воздухопловни вежби, во кои учествуваше најмалку еден американски стратешки бомбардер Б-1Б над Корејскиот Полуостров, според јужнокорејската новинска агенција „Јонхап“.
Во средата, Северна Кореја истрела две тактички балистички ракети кон североисток, велејќи дека одржала „вежба за тактички нуклеарен напад“ како одговор на заедничките воени вежби на САД и Јужна Кореја.
