Словенечката полиција пронашла тело на жена во шума во близина на Мајшперк, соопшти Полициската управа во Марибор. Телото е на 31-годишна австриска државјанка која исчезна минатиот викенд. Во последните денови ја барале и во Австрија и во Словенија.
Кривични истражители од Полициската управа во Марибор веќе извршиле увид на местото на злосторството, а присутни се дежурниот истражен судија и дежурниот државен обвинител.
Главен осомничен во случајот со исчезнувањето на австриска државјанка е нејзиниот поранешен партнер , 31-годишен словенечки државјанин со постојан престој во Австрија. Тој беше уапсен на почетокот на минатата недела и предаден на австриските судски власти на крајот од неделата, пишува РТВ Сло.
Според австрискиот весник „Кронен Цајтунг“, осомничениот наводно ѝ дал информации на австриската полиција по неколкучасовно испрашување што ги довело до телото во шумата. Според весникот, осомничениот наводно ја задавил својата поранешна партнерка, го ставил телото во куфер и го закопал во шумата во близина на Мајшперк.
Убиената 31-годишна Австријка последен пат била видена рано наутро во недела, откако се вратила дома од забава. Му пратила порака на пријател дека безбедно пристигнала дома, а потоа исчезнала. Требало да има фотосесија во центарот на Грац рано попладне во недела, но не се појавила.
Кога таа не одговорила на повиците, австриската полиција била контактирана од членови на семејството и колеги во неделата навечер. На почетокот на истрагата, полицијата открила индиции дека нејзиното поранешно момче можеби е поврзано со исчезнувањето. Наводно осомничениот ја преминал австриско-словенечката граница со своето лично возило неколку пати во последните денови , што покренало дополнителни сомневања.
Извор: tv21
