Во публикацијата на СЗО се наведува дека овој список ќе биде витална алатка која на државите ќе им помогне навремено да испорачаат, да набават и да ги складираат потребните лекови за оние кои евентуално би биле изложени на ризик од радиоактивно зрачење
Светската здравствена организација (СЗО) денеска објави публикација која содржи ажуриран список на лекови кои треба да се складираат во случај на нуклеарна опасност и изложеност на радијација.
Во публикацијата на СЗО се наведува дека ажурираниот список опфаќа лекови кои или ја спречуваат или ја намалуваат изложеноста на зрачење, но и содржи и такви кои ги олеснуваат здравствените проблеми откако лицето веќе било изложено на зрачење.
„Од суштинско значење е владите да бидат подготвени да го заштитат здравјето на населението и веднаш да реагираат на итни случаи. Тоа вклучува резерви на лекови за спасување животи кои ќе ги намалат ризиците и ќе ги третираат повредите од зрачење“,
вели д-р Марија Неира, вршител на должноста помошник генерален директор на СЗО.
Во публикацијата дополнително се наведува дека овој список ќе биде витална алатка која на државите ќе им помогне навремено да испорачаат, да набават и да ги складираат потребните лекови за оние кои евентуално би биле изложени на ризик од радиоактивно зрачење.
„Типични лекови кои би требало да се користат во случаи на изложеност на радиоактивно зрачење се: стабилен јод, кој се применува за да се спречи или намали изложеноста на тироидната жлезда на радиоактивен јод, цинков или калциумов диетилентриамин пента-ацетат (DTPA) кој се користи за лекување на внатрешна контаминација со трансурански радионуклиди, цитокини кои се користат за ублажување на оштетувањето на коскената срцевина, во случај на акутен радијациски синдром и други лекови кои се користат за лекување при повраќање, дијареа и инфекции“,
се наведува во публикацијата.
Оваа публикација го заменува извештајот на СЗО од 2007 година за развојот на националните резерви за итни случаи на радијација, а во себе вкучува ажурирани информации засновани на истражувањата во последната деценија.
Извор: 360stepeni.mk
