Охридската депонија Буково и дивата депонија на влезот на Струга, останува темпирани еколошки бомби и сериозна опасност по здравјетго на граѓаните. Иако со години се ветува решение на овој сериозен проблем, сето тоа останува само на хартија и празни зборови. Еколошките активисти постојано алармираат на сериозните последици од нив. Се уште актуелниот градоначалник на Струга, Рамиз Мерко, уште во својот претходен мандат ветуваше дека депонијата ќе биде затворена,а отпадот ќе се носи на друга локација. Но од тоа останаа само зборовите.
„Депонијата се уште функционира и таму се одлага отпад.Според некои податоци кои ги имаме, околу 40000 тони годишно се одлага.Во последните три години што не се решава тој проблем, на таа депонија, се депонирани околу 120000 тони отпад.Тоа би значело дека депонијата секоја година расти по еден кат во градба“, рече Глигорие Ќатоски- граѓански активист од Струга.
Охридската депонија покрај за Охрид, е голем проблем и за селата во Преспанскиот регион.
„Најразличен неселектиран отпад гори и предизвикува чад и честици, кои доаѓаат во охридскиот дел иако Охрид е на 700 метри надморска височина. Сепак Буково е повисоко и струењето на ветровите можат да предизвикат и тоа загадување да биде и во Охрид. Горењето на неселектиран отпад како од депонија предизвикува најразлични канцерогени материи“, рече Сашо Точков-Центар за јавно здравје-Охрид.
Охрид со години особено во текот на летните месеци се дави во чадот и смрдеата кои се шират од депонијата. Тој е сериозна закана по здравјето на луѓето. Неодамна во ноќните часови од страна на непознат сторител бил подметнат пожар на депонијата.
„Ј.П.„Охридски Комуналец” веднаш го извести и СВР-Охрид за поднесување пријава за подметнат пожар од непознат сторител.Со специјална механизација опожарениот дел од депонијата се покриваше со големи количини земја“, велат од Охридски комуналец.
Потребно е депонијата да биде физички обезбедена, но и да биде оградена за да се спречи влез на луѓе.
„Добро е да има и постојан мониторинг со термални камери, кои работат на инфра црвена светлина и ја мерат разликата на температурата, а кои ќе овозможат брз одговор кога ќе се појават први знаци на пожар и сето тоа да се комбинира со поставување на деектори на чад “, нагласи Ѓоко Зороски-екологист.
Единствено решение на проблемот е изградбата на регионаланата депонија, но засега проектот е само на хартија./Алсат.мк
Мики Трајковски
Извор: alsat.mk
