ЕРУСАЛИМ/АЛ-КУДС (АА) – Стотици Израелци се обидоа да стигнат до резиденцијата на премиерот Бенјамин Нетанјаху во Западен Ерусалим (Ал-Кудс) за да извршат притисок врз Владата да постигне договор за размена на заложници со палестинските групи, јавува Анадолу.
Демонстрантите се обиделе да се приближат до резиденцијата на Нетанјаху, но полицијата ги спречила да го сторат тоа, пишува израелскиот дневен весник „Једиот Ахронот“.
Десетици демонстранти во Тел Авив, исто така, побараа договор за размена на заложници и се обидоа да блокираат дел од главниот автопат Ајалон во центарот на градот.
Во северниот град Нетања стотици Израелци протестираа на влезот во градот, држејќи голем транспарент на кој пишуваше „Доста е веќе, деструктивна Влада.“
Прекршувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Појасот Газа, започната по нападот на палестинската група на отпорот Хамас на 7 октомври минатата година.
Според локалните здравствени власти, оттогаш се убиени повеќе од 38.150 Палестинци, главно жени и деца.
Израел е обвинет за геноцид пред Меѓународниот суд на правдата, со чија последна одлука им се наложи на израелските власти веднаш да ја прекинат воената операција во јужниот град Рафа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарна помош не е доволна за решавање на хуманитарната катастрофа.
Извор: Anadolu Agency (AA)
